Тие вклучуваат 31 одделна точка за намерно задржување информации за националната одбрана според Законот за шпионажа.
Во обвиненијата се наведува дека документите се однесуваат на одбранбените и оружените капацитети на САД, американската нуклеарна програма, можните ранливости на САД и нивните сојузници и плановите за можни одмазднички напади.
Трамп ги чувал доверливите документи во својата бања.
Министерството за правда ги објави документите за обвинението на денот кога двајца адвокати на Трамп поднесоа оставка.
Фотографиите објавени од обвинителството покажуваат кутии со документи кога биле одземени од неговиот имот Мар-а-Лаго на Флорида.
Волт Наута, помошник на Трамп, исто така се соочува со неколку обвиненија за наводно лажење на обвинителите за тоа како биле складирани и транспортирани деликатните документи.
Специјалниот советник Џек Смит, кој го води обвинителството, одржа кратка прес-конференција на која зборуваше само неколку минути и не одговараше на никакви прашања.
Тој побара од јавноста да ги прочита обвиненијата „целосно“ и да ги разбере „обемот и тежината на кривичните дела од обвиненијата“.
Трамп првпат треба да се појави пред судот во Мајами во вторник, ден пред неговиот 77-ми роденден.
Обвинението против поранешниот американски претседател на федерално ниво е без преседан во американската историја и се случува додека Трамп е републиканскиот фаворит да биде кандидат на изборите следната година.
Неговите правни проблеми не ја намалија неговата популарност меѓу републиканските гласачи, покажуваат анкетите на Ројтерс и Ипсос. Партиските ривали застанаа зад него и ги критикуваа обвиненијата како политички мотивирани.
