Џафери најверојатно ќе оди директно на усвојување на законот за јазиците, без амандманска расправа

Денеска во Собранието треба да се одржи 32 седница на која како осма точка од дневниот ред е третото читање од Законот за употребата на јазиците, со европско знаменце..

Засега нема информации дали и каков договор е постигнат меѓу пратеничките групи на ДУИ и СДСМ за тоа дали воопшто ќе почне амандманската расправа или ќе се гласа директно за законот. Минатата недела пратениците на СДСМ и ДУИ не постигнаа договор за тоа дали да се отвори расправа за амандамните или не. Тогаш дел од пратениците на СДСМ бараа за амандманите да се расправа без да се крши Деловникот на Собранието.

Парламентарното мнозинство најавува дека ќе го донесе Законот за употреба на јазиците без да ги расправа за амандманите поднесени од ВМРО-ДПМНЕ.

Од ВМРО-ДПМНЕ најавуваат дека тие денеска ќе присуствуваат на седницата и ќе ги бранат амандманите.

Премиерот Зоран Заев деновиве изјавува дека оваа недела законот треба конечно да се донесе. „Чекорите ќе се движат во согласност со демократските процедури и ваквите прашања што ќе ја крепат мултиетничноста на државата, конечно, ќе бидат затворени“, рече Заев.

Лидерот на ВМРО-ДПМНЕ Христијан Мицкоски, вчера изјави дека пратениците ќе се појават во пратеничките клупи на закажаната собраниска седница за расправа за Законот за употреба на јазиците.

„Повикувам на почитување на Деловникот, законите, бидејќи ова не смее да се дозволи, лошо ќе влијае за имиџот на Република Македонија и пред меѓународната заедница и пред домашната јавност. За последен пат повикувам на разум да се избегне едно девијантно однесување во парламентот, насилно усвојување на овој закон и повикувам на почитување на Деловникот и разгледување на амандманите и отворање на амандманска расправа што ВМРО-ДПМНЕ ја очекува. Сето останато ќе предизвика реперкусии и за тој што ќе се одлучи да ги прекрши законите и сите оние што ќе го поддржат во таа постапка“, рече Мицкоски.

Законот за употреба на јазиците е во трето читање во Собранието, откако тој непотпишан од претседателот на државата Ѓорге Иванов и со низа забелешки беше вратен во Собранието. Врз основа на овие забелешки 35.569 амандмани поднесе само опозициската ВМРО-ДПМНЕ, за кого законот е неуставен и треба да се повлече.

Не е исклучена и можноста претседателот на Собранието Талат Џафери да ги отфрли амандманите и да се повика на одредбите од собранискиот Деловник, кои предвидуваат дека не може парламентот да одлучува дали некој закон е во согласност со Уставот и да ги отфрли амандманите како неосновани.



Copyright 2017 Falanga Сите права се задржани.
Текстот не смее да се печати или емитува, во целина или во делови без договор со Falanga.




Scroll To Top