Во пресрет на самитот: Северна Кореја се надева на нови односи со САД

Севернокорејските државни медиуми сметаат дека средбата на нивниот лидер Ким Јонг ун и американскиот претседател Доналд Трамп е можност за земјата “да воспостави нови односи” со САД..

Коментарите, на еден ден пред историските разговори, претставуваат промена во тонот од Северна Кореја по неколку децении на непријателство кон САД.

Во меѓувреме, и Трамп изјави дека има “добро чувство” за многу очекуваниот самит.

Двајцата лидери веќе пристигнаа во Сингапур.

Многу малку детали од агендата се објавени во јавноста.

Јужнокорејската новинска агенција Јонхап објави дека високи дипломати од двете земји во понеделникот се состанале во Сингапур за да го подготват нацрт договорот за средбата на нивните водачи.

Американскиот претседател и лидерот на Северна Кореја престојуваат во одделни хотели, недалеку еден од друг, и ќе се состанат утре во хотел на Сентоса, популарен туристички остров неколку стотици метри од копното на Сингапур.

Трамп на  Твитер утрово објави дека има “возбуда во воздухот” во азиската земја пред самитот.

Тој се надева дека состанокот ќе започне процес кој на крајот го гледа со откажувањето на Ким од нуклеарното оружје.

Државните медиуми на Северна Кореја вообичаено не известуваат за активностите на лидерот во реално време, па самитот досега е само споменат.

Во уредничкиот коментар во Родонг Синмун се изразуваат очкувања дека “ќе се воспостават нови односи  за да се одговори на променливите барања на новата ера”.

Притоа се вели дека ќе бидат разменети “широки и темелни мислења” за “воспоставување постојан и мирен режим на Корејскиот полуостров и за решавање на проблемите кои се од заеднички интерес, вклучувајќи ги и прашањата за реализација на денуклеаризацијата на Корејскиот полуостров”.

-Дури и ако некоја земја имаше непријателски однос со нас во минатото, нашиот став е дека ако оваа земја ја почитува нашата автономија … ќе се обидеме да го нормализираме преку дијалог, се вели во коментарот.

Заколнати непријатели

Со децении САД се заколнати непријатели. Во Пјонгјанг постојат дури и антиамерикански музеи.

Но, сега преку медиумите се промовира идејата идејата за разговор со она што некогаш беше “инкарнација на секакви зли, империја на ѓаволи”.

Затоа во коментарот на Родонг Синмун има повеќе пораки.

Во англиската верзија, самитот се прикажува како шанса за реализација на “денуклеаризацијата на Корејскиот полуостров и другите прашања од взаемна загриженост, како што се бара од новата ера”.

Тоа е таа “променета ера” што е важна. Северна Кореја помина децении во изградба на нуклеарен арсенал со кои ја чинеа земјата многу. Ким Јонг-ун сега треба да му каже на својот народ зошто е подготвен да преговара.

Неговиот новогодишен говор – оној што го започна овој дипломатски процес – беше за стратегијата на Северна Кореја за градење на економијата откако ја постигна целта да стане нуклеарна сила.

Овој напис е значаен затоа што го отвора патот за можна промена во пораката на државата и им оди во корист на оние кои тврдат дека овој пат со Северна Кореја – работите би можеле да бидат различни.

Што доведе до средбата

Во текот на измјинатите 18 месеци, комуникацијата на Трамп и Ким се движи од добра, до најлоша.

Првата година на претседателствувањето на Трамп беше обележана со размена  на жестоки зборови со Ким – додека Северна Кореја спроведе неколку тестови на балистички проектили.

Американскиот претседател беше тој што иницираше заострување на санкциите на ОН за Пјонгјанг и да го натера неговиот традиционален сојузник, Кина, да им се придружи. Тој, во една прилика вети дека Пјонгјанг ќе се соочи со “оган и гнев” ако  продолжи да им се заканува на САД. За Ким рече дека е “ментално пореметен” и “досада”.

Северна Кореја во септември лани го спроведе својот шести нуклеарен тест. Набрзо потоа, Ким изјави дека неговата земја ја остварила својата мисија да стане нуклеарна држава, со проектили што би можеле да стигнат до САД.

На почетокот на 2018 година се случи пресврт во односите. Се започна со значајни дипломатски комуникации меѓу Северна Кореја и Јужна Кореја за време на Зимските олимписки игри. Во март, Трамп го шокираше светот со тоа што ја прифати покана од Ким за средба.

На какви отстапки се подготвени

Денуклеаризацијата е централно прашање во пресрет на разговорите. САД сакаат Северна Кореја да се откаже од своето нуклеарно оружје, но се очекува Северна Кореја да се спротивстави на тоа и не е јасно што би можело да побара за возврат.

Ким, исто така, рече дека сака да се фокусира на градење на севернокорејската економија – и на тој начин сака олеснување на санкции и меѓународни инвестиции. Прашањето е какви отстапки тој е подготвен да направи и дали ќе се придржува до какви било ветувања.

Сепак, многумина не очекуваат утре во Сингапур да биде постигнат конечен договор. Трамп го опиша како состанок “за запознавање со ситуацијата” и рече дека “тоа ќе биде процес”.


Copyright 2017 Falanga Сите права се задржани.
Текстот не смее да се печати или емитува, во целина или во делови без договор со Falanga.




Scroll To Top