Американски претставници се упатуваат кон Русија за да разговараат за можен прекин на огнот во Украина, најави претседателот на САД, Доналд Трамп, пренесува Би-Би-Си.

Веста доаѓа откако украинските претставници се согласија на 30-дневен прекин на огнот по долгоочекуваната средба со американски официјални лица во Саудиска Арабија.

Претходно, државниот секретар Марко Рубио изјави дека „топката сега е на руски терен“ и дека САД веруваат оти единствениот начин за крај на војната е преку мировни преговори.

Американската посета се случува во момент кога Кремљ тврди дека претседателот Владимир Путин ја посетил руската област Курск – чии делови се под украинска контрола од минатогодишната инвазија.

По средбата во Џеда во вторникот, украинскиот претседател Володимир Зеленски изјави дека сега е на САД да ја убедат Русија да го прифати „позитивниот“ предлог.

Кремљ соопшти дека го проучува договорот за прекин на огнот и дека е можен телефонски разговор меѓу Трамп и рускиот претседател Владимир Путин.

Говорејќи заедно со премиерот на Ирска, Михол Мартин, во Овалната канцеларија во средата, Трамп изјави дека добил „позитивни пораки“ за можноста за прекин на огнот.

„Но, позитивна порака не значи ништо. Ова е многу сериозна ситуација,“ рече тој.

Трамп не прецизираше кои претставници патуваат за Москва.

Меѓутоа, портпаролката на Белата куќа Каролин Левит изјави дека секретарот за национална безбедност Мајк Волц разговарал со својот руски колега.

Во меѓувреме, извор за Би-Би-Си потврди дека специјалниот пратеник на САД за Блискиот Исток, Стив Виткоф, ќе отпатува за Москва на преговори по средбата во Џеда.

Белата куќа во средата ги потврди овие планови.

„Ги повикуваме Русите да го потпишат овој план. Ова е најблиску што сме биле до мир во оваа војна“, изјави Левит.

Кремљ соопшти дека го проучува предложениот прекин на огнот и дека повеќе детали ќе пристигнат „преку различни канали“ во наредните денови.

Во Овалната канцеларија, Трамп изјави дека прекинот на огнот би бил во интерес на Русија, додавајќи дека има „многу ризици за Русија“ ако не го прифати.

„Имаме многу сложена ситуација која е решена од една страна. Скоро решена. Разговаравме и за земјиштето и другите поврзани прашања. Знаеме за кои територии зборуваме, дали ќе има повлекување или не“, додаде Трамп.

За да изврши притисок врз Русија, Трамп изјави дека „може да преземе финансиски мерки“.

„Тоа би било многу лошо за Русија. Но, не сакам да го направам тоа, затоа што сакам мир“, рече тој.

Средбата во Џеда беше прва средба меѓу американски и украински претставници по средбата на 28 февруари меѓу Зеленски, Трамп и потпретседателот Џеј Ди Венс која заврши со жестока расправија и пауза во американската воена помош и размена на разузнавачки податоци со Украина.

Оваа пауза беше прекината по средбата во Џеда, а Трамп изјави дека сега верува дека украинската страна и Зеленски сакаат мир.

Додека преговорите за прекин на огнот продолжуваат, борбите во Украина не стивнуваат.

Руски дронови и ракети наводно погодиле цели во Криви Рих – родниот град на Зеленски – како и во пристанишниот град Одеса, Днипропетровск и Харков.

Судирите продолжуваат и во руската област Курск, каде што, според портпаролот на Кремљ, Дмитриј Песков, руските трупи „успешно напредуваат“ и освојуваат територии под контрола на Украина.

Подоцна во средата, Кремљ објави дека претседателот Путин ја посетил командната база во регионот.

Во снимките објавени од Кремљ, тој е прикажан заедно со воениот командант Валериј Герасимов, обајцата во воена опрема.

Ова е прва посета на рускиот претседател на регионот од украинската инвазија во август минатата година.

Руските медиуми јавуваат дека Путин наредил „целосно ослободување“ на регионот за време на посетата.

Тој сè уште не се изјаснил за предлогот за прекин на огнот, кој беше договорен меѓу Украина и САД во вторникот.

Началникот на украинската армија, Олександр Сирски, исто така во средата изјави дека некои украински трупи се повлекуваат од Курск.

Во објава на Телеграм, тој напиша: „Во најтешката ситуација, мој приоритет беше и останува зачувувањето на животите на украинските војници.“