Судот им одреди притвор на 10 лица од Тетово и Гостивар под сомнение за „трговија со деца“. Според Јавното обвинителство, жената која се грижела за три деца на возраст од 14, 10 и 7 години го присилувала 14 годишното девојче на сексуални услуги во замена за пари. Постојано ѝ се заканувала дека ако одбие, ќе оди во дом или кај семејството со кое имало нарушени односи.
Обвинителство за организиран криминал:
„Првоосомничената во 2020 година го прифатила 14 годишното дете – жртва, во својот дом, а подоцна ги прифатила и нејзините 10 годишна сестра и 7 годишен брат за да се грижи за нив поради нарушените односи во нивното семејство. Набргу потоа искористувајќи ја состојбата на немоќ и ранливост на детето – жртва, заканувајќи ѝ се и применувајќи други форми на присилба, започнала да го подведува детето на вршење полови дејствија со дел од осомничените и други непознати лица за одреден паричен надомест. Честопати заканите кон детето – жртва биле поврзани со нејзините брат и сестра, дека доколку не ги прифати договорените сексуални активности, децата ќе ги остави во дом или ќе ги врати кај нивната мајка. Подоцна, уште тројца од осомничените, по претходен договор со првоосомничената, а со цел стекнување за себе противправна имотна корист, две години, искористувајќи ист траен однос и исти прилики, во повеќе наврати, го подведувале детето на вршење полови дејствија по пат на сексуална експлоатација со останатите осомничени и други непознати лица меѓу кои имало и жена.“
Според полицијата, девојчето имало и здравствени проблеми.
Сите осомничени ќе бидат гонети за кривично дело „трговија со деца“, а во обвинението е наведено дека станува збор за кривично дело со малолетник. Според Конвенцијата за правата на децата, делата за кои се обвинети осомничените може да добијат затворска казна од 8 до 10 години.
