По низа затворени предмети, но и 6 активни од кои ниеден недовршен, Републичкото обвинителство конечно тргна во поход да ги провери сите предмети против струшкиот градоначалник Рамиз Мерко. Формирале четиричлена комисија која врши надзор на постапувањето во предметите во Основното обвинителство во Струга и Вишото обвинителството во Битола. Ова денеска го соопштија од обвинителството, од каде велат:

„По целосните проверки на постапувањето, Комисијата ќе изготви извештај.“, велат од ОЈО.

Но, обвинителството не соопштува детали – дали предметот на антикорупционерите за Мерко, а кој се однесува на набавката на луксузното Ауди А6 се уште е активен или не. Оваа информација ја немаат ниту во ДКСК, со образложение дека се чешлаат предметите за струшкиот градоначалник и затоа не можат да споделат детали.

„Проверките се во тек.  Во предметите се врши увид во постапувањето и од тие причини не сме во можност да споделуваме детали додека проверките не завршат.“, велат од ОЈО.

Во меѓувреме, Судскиот совет се уште не дава информација, до каде е формирањето на комисија која ќе ги чешла предметите во струшкиот суд. Иако за денеска беше најавен и одговор на наводите на антикорупционерите, како се изгубил предметот за судијата кој дозволил да се зголеми буџетот на Општина Струга за набавка на возила, меѓу кои и луксузното Ауди, до овие вести, ја нема ниту оваа информација.

Ставањето на Рамиз Мерко на црната листа пак, ги скара и бирото за судски вештачења со обвинителите – Додека обвинителството во едниот од шесте предмети вели дека се уште се чека вештачење, од Бирото велат дека предметот е во застој бидејќи ОЈОГОКК одбило да достави дополнителна документација, со што се оневозможило докажувањето на евентуално кривично дело.