Monday, March 8, 2021
Home Спорт Тежок пораз од Шведска, Македонија се насочува кон Египет и Чиле

Тежок пораз од Шведска, Македонија се насочува кон Египет и Чиле

Македонската ракометна репрезентација претрпе убедлив пораз во натпреварот од првото коло на Светското првенство во рамките на Групата Г од Шведска со 32:20.

Швеѓаните и покрај тоа што се без повеќемина стандардни репрезентативци, сепак во моментов се чини дека се подобра репрезентација од нас. По овој пораз, нашата репрезентација се насочува на натпреварот со Египет кој го играме в сабота, а најверојатно натпревар кој ќе одлучува за пласманот на нашите репрезентативци во следната фаза ќе биде оној против Чиле.

Големиот број технички грешки во нападот, како и недоволно цврстата одбрана која Шведска на моменти и прелесно ја пробиваше се покажаа како главни причини за убедливиот пораз, и покрај тоа што Митревски во првото и Томовски во второто полувреме имаа одлични моменти со неколку клучни одбрани.

Нашата репрезентација освен во првата половина од првото полувреме, не успеа да и парира на Шведска. По почетното водство се играше гол за гол, по што Македонија влезе во серија грешки, а тоа беше почетокот на серијата на Шведска која поведе со 14:9, по што нашите репрезентативци не успеаја да се консолидираат. Брестовац им даде поголема минутажа на играчите од клупата, јасно алудирајќи на тоа дека фокусот ќе биде ставен на следните мечеви за што треба да се зачува и силата на првотимците. Долго време Македонија не успеваше да постигне гол, по што следуваше една мини серија, но и Шведска успеа да одговори на спротивната страна, па на паузата се замина со 16:11.

Во второто полувреме Шведска тргна фуриозно, експресно успеа да поведе и со девет голови разлика, по што јасно натпреварот веќе беше решен. Томовски беше веројатно единствената светла точка во вториот дел, успевајќи да собере шест интервенции.

Швеѓаните не се откажуваа и играа исто постојано, без оглед на резултатот и убедливото водство, а тоа, заедно со грешките, доведе до тоа конечниот резултат да гласи 32:20.

Големиот број на технички грешки, речиси три пати повеќе од Шведска, се очигледен резултат на неискуството на оваа подмладена репрезентација, но секако, тоа е дел од создавањето на тим за следната деценија. Сега пред Брестовац е задача да ги дигне младите ракометари психички и да не дозволи овој убедлив пораз да влијае на самодовербата на ракометарите, но и да се направи добра анализа за натпреварот со домаќинот Египет.

Ване беше нерешлива енигма за нашата репрезентација постигнувајќи 11 погодоци. Персон беше втор стрелец кај Швеѓаните со шест погодоци, додека во нашата репрезентација најефикасен беше Лазаров со 5 гола, а по два имаа Костески, Пешевски, Поповски, Танкоски и Стоилов.

Популарно

- Реклама -