Капитенот Енис Барди не можеше да го сокрие задоволството од ремито со Италија во квалификациите за ЕП 2024. На вистински начин ја предводеше репрезентацијата, а со феноменалниот погодок донесе реми за уште едно стопирање на „аѕурите“.

Македонија уште еднаш против европскиот шампион покажа дека и тоа како знае да игра фудбал. А, пласман во баражот за СП 2022 и оние победи против Италија и Германија и тоа како не биле случајност…

„Многу тежок натпревар како што очекувавме против еден тим како Италија. Но, да бидам искрен, и против еден таков европски шампион, ние бевме тие кои имавме далеку поактивна иницијатива и имавме почисти шанси. Тоа ме прави горд. Горд сум на овие момци затоа што ние сме мала земја, но тука има многу ‘лавови’ кои не прифаќаат пораз“ – истакна Барди по денешниот меч, притоа дополнувајќи:

„Чувствував и дополнително енергија што сум капитен на овој тим. И претходно кажав дека мене ми е чест и задоволство да ја носам таа лента. Но, искрено, во оваа репрезентација има многумина што ми помагаат да се носам со тој притисок, кои ми помагаат да се обидам да ги предводам, како Столе, Елиф, Нестор, Аце, Џани… Сите тие поискусните многу ми ја олеснуваат оваа задача и затоа може да кажам дека сум пресреќен. Само да продолжиме на овој начин“.

Енис нагласува дека сега мора да се продолжи на овој начин затоа што репрезентацијата врти нов лист.

„Ова е наш нов лист, со нови мисли, со нова енергија и мора да бидеме паметни затоа што ако не сме екипа ништо не можеме да направиме. Мора да бидеме екипа, вака како што бевме вечерва за повторно да ги радуваме навивачите“ – вели новиот македонски капитен.