Јанакиески, Пешевски и Ѓорѓиевски, денеска последен пат беа во судница како обвинети за изградбата на кинеските автопати. Обвинителката Лиле Стефанова, се откажа од кривичен прогон на тројцата поранешни функционери кои одговараа за злоупотреба на положбата. Измените на кривичниот законик донесени од владата, го застареле обвинението, кажа во судницата Стефанова. Појасни дека повеќе нема да се гони и поранешниот премиер Груевски, иако делото за кое тој одговараше веќе застаре во текот на судската постапка.

„Имајќи ги предвид измените во КЗ и обвинението против Пешевски, Јанакиески и Ѓорѓиевски кои се обвинети за Злоупотреба на службената положба и против обвинетиот Груевски дека ги поттикнал да го сторат делото, го повлекувам обвинението бидејќи настапила апсолутна застареност на кривичното гонење“, објаснуваше во судницата обвинителката Стефанова.

Поранешниот премиер, двајцата министри и директорот на државни патишта одговараа за оштетување на државниот буџет за над 150 милиони евра. Според обвинението, иако имало и поевтина понуда, тие одлучиле автопатите кон Штип и Охрид да ги гради кинеската Синохидро.

Судењето за предметот Траекторија почна во 2018та. Три години подоцна, беше разрешен судијата бидејќи наместо во пресудата, застарување на кривичното дело за поранешниот премиер, констатирал во текот на судската постапка. Судењето се врати на почеток и не доби првостепена пресуда.

Траекторија е последен во низата предмети кои застареа со измените во Кривичниот законик. Неделава застаре и случајот Пациент, а прекина и судењето за масовното прислушување.