Анкетата на „Њујорк Тајмс“ објавена денеска, осум месеци пред претседателските избори во САД, покажува дека американскиот претседател Џо Бајден заостанува пет проценти зад Доналд Трамп.
Доколку изборите се одржат денеска, 43 отсто од Американците би гласале за демократскиот претседател Бајден, додека 48 отсто својот глас би го дале за за поранешниот претседател од редовите на Републиканската партија, што е благ пораст во корист на Трамп во споредба со последната анкета спроведена од „Њујорк Тајмс“ во декември.
Десет проценти од гласачите на Бајден во 2020 година сега го поддржуваат Трамп. Само еден од четворица гласачи смета дека земјата оди во добра насока, а „според мнозинството економијата оди лошо“, додава весникот.
И покрај бројните правни неуспеси, поранешниот претседател „освои 97 отсто од гласовите на оние кои рекоа дека гласале за него пред четири години, а речиси ниту еден од неговите поранешни поддржувачи не рече дека сака да гласа за Бајден.
Спротивно на тоа, „Бајден добива само 83 отсто од своите гласачи во 2020 година, а 10 отсто од нив велат дека сега го поддржуваат Трамп“.
