Американското Министерство за правда ги обвини за тероризам лидерите на Хамас. Случајот произлегува од ненадејниот напад на палестинската милитантна група врз Израел на 7 октомври, во кој беа убиени околу 1.200 луѓе, а повеќе од 200 лица беа киднапирани.
ФБИ покрена обвинение во февруари.
Американскиот јавен обвинител Мерик Гарланд објави дека политичкиот шеф на Хамас Јахја Синвар и уште пет други високи членови биле соучесници во „планирањето, поддршката и извршувањето на терористичките злосторства“. Тие беа обвинети за обезбедување средства и материјална поддршка за тероризам, како и за заговор за извршување бомбашки напади и „употреба на оружје за масовно уништување“.
„Со децении, Хамас и неговото раководство се посветија на искоренување на државата Израел и на убивање, осакатување и брутализација на сите – вклучително и десетици Американци – што им застанаа на патот“, соопшти Министерството за правда. Во него се додава дека повеќе од 40 американски државјани биле убиени на 7 октомври, а уште осум биле киднапирани.
Освен Синвар, Министерството за правда го обвини и водачот на дијаспората на Хамас, Калед Мешал и шефот за надворешни работи Али Барака, кои живеат во Катар и Либан.
Тројца од функционерите на Хамас по кои трагаше Министерството за правда се убиени. Поранешниот политички шеф Исмаил Ханије беше убиен во јули во Техеран. Израел тврдеше дека командантите Мохамед Деиф и Марван Иса биле убиени за време на воздушните напади на ИДФ во Газа. Меѓутоа, Хамас одби да ја потврди нивната смрт.
Според Ројтерс, Министерството за правда првично се надеваше дека ќе го фати Ханије жив, но на крајот реши да ги обзнани обвиненијата по веста за неговиот атентат.
Во мај, главниот обвинител на Меѓународниот кривичен суд побара од судиите да издадат налози за апсење за Ханије, Синвар и Деиф, како и за израелскиот премиер Бенјамин Нетанјаху и министерот за одбрана Јоав Галант, наведувајќи обвиненија за воени злосторства.
Минатата година Јужна Африка поднесе случај до Меѓународниот суд на правдата, посебно судско тело, обвинувајќи го Израел за геноцид во Газа, каде што од почетокот на конфликтот се убиени повеќе од 40.000 Палестинци. Израел ги отфрли обвинувањата како „апсурдни“.
