ВМРО-ДПМНЕ бара итно лидерот на СДСМ, Димитар Ковачевски да одлучи за еден од двата предлози на Христијан Мицкоски за продолжување на преговорите во врска со уставните измени.

Од друга страна, како што изгледа на Ковачевски не му се брза. Тој постојано ја поздравува одлуката на Мицкоски за поддржување на уставните измени.

„И сега одеднаш, со една изјава, на прес конференција се тоа не важи. Одеднаш не е проблем дел од бугарскиот народ да влезат во Уставот. Со една изјава прифатливи се уставните измени, прифатено е учество во Влада со СДСМ и други партии. НЕ стана ДА. Затоа што ДА е секогаш посилно од НЕ“, вели Димитар Ковачевски.

ДУИ и вчера по состанокот на централното раководство потврди дека се спремни да поддржат Влада без ДУИ, доколку, како што рече Османи, тоа ќе овозможи уставни измени.

„Повикувајќи се на консензуалната потреба на луѓето, за подобар животен стандард, за побезбедна и европска иднина, повторно и едногласно ја потврдуваме одлуката дека ДУИ е спремна да ја стави ЕУ пред секој друг партиски и политички интерес. Силно го поддржуваме ставот дека сме спремни да поддржиме влада во која нема да биде ДУИ доколку тоа ќе овозможи пред формирањето на таа Влада да имаме уставни измени кои ќе стапат на сила“, вели Бујар Османи.

Инаку пред неколку дена претседателот на Собранието, Талат Џафери објасни дека процедурите за уставни измени траат околу 4.5 месеци. Ваквата пресметка ја основаше во претходното искуство за промена на уставното име на државата. Според Џафери критичен момент ќе биде пред затворањето на скрининг процесот, а тоа е крајот на ноември.