Фудбалерите на Македонија приредија изненадување и ѝ откинаа два бода на Италија (1-1) во рамките на квалификациите за Европското првенство. Иако „аѕурите“ не беа расположени и среќни поради резултатот, лидерот на делегацијата Џанлуиџи Буфон покажа класа.

Имено, Столе Димитриевски на првиот репрезентативен собир месецов се појави со ретро дрес од италијанската легенда. Тој го привлече вниманието и најави дека сака потпис на дресот од Буфон. Пред неколку години, Димитриевски сакал да го добие дресот на Буфон од меѓусебниот дуел со Македонија во Торино, меѓутоа истиот беше планиран да се најде на аукција.

Сега, Столе се сретна со својот идол, срдечно се поздравија и доби порака на стариот дрес од Јувентус. Екс-голманот на Италија беше пресреќен за средбата и јасно беше дека му е чест што македонската „единица“ го побара за овој автограм.