Придонесот на НАТО во обезбедување заштита за Западна Европа, проширувањето кон Западен Балкан и кон северниот дел на Европа, спроведувањето мировни мисии и асистенции во повеќе земји низ светот го изградија НАТО во глобален партнер и извозник на мир и стабилност во светот. Ова го истакна претседателот на Собранието Талат Џафери во своето обраќање на состанокот на високо ниво на претседатели на парламенти на земјите членки на НАТО што се одржува во главниот град на Литванија Вилнус. Тој особено го истакна влијанието НАТО во стабилноста на регионов особено во земјава.
„Мојата земја Република Македонија е пример на земја која беше увозник, а денес е извозник на мир, активен партнер и контрибутор на алијансата. Преку остварувањето на оваа наша стратешка цел, која е мнозинска определба на сите наши граѓани, ние успеавме да ја заштитиме независноста, територијалниот интегритет, неповредливоста на меѓународно признатите граници на државата, но и да промовираме добрососедска политика и стабилност во поширокиот регион“, рече Џафери.
Тој укажа дека новите глобални безбедносни и геополитички трендови во себе носат закани за безбедноста на државите, за кои е потребно градење на соодветни механизми. Како особено опасни ги посочи хибридните закани лажните вести и дезинформации кои директно влијаат на безбедноста на државите.
„Нашиот регион на Западен Балкан е жив сведок на овие активности особено во последната деценија. Прашањето кое тука се поставува е дали НАТО се менува или дали ние како земји членки и како парламенти придонесуваме во таа промена и адаптација за иднината. Немаме друга алтернатива освен да продолжиме да се бориме за опстојување на системот на владеење на правото, над системот на владеење на силата и менувањето на границите со употреба на сила.“, изјави Џафери.
Џафери истовремено посочи и дека НАТО мора и натаму да продолжи со зајакнувањето на постојните партнерства како и вклучување нови сојузни со држави и организации кои се уште веруваат во свет заснован на демократски и либерални вредности. На маргините на состанокот е предвидена и демонстративна вежба од припадници на борбената група на НАТО.
